FILIPINO

Sa pagtuturo ng Filipino, ang layunin ng guro para sa kanyang mga mag-aaral ay malinang ang kakayahan nila sa pakikinig, pagsasalita, pagbasa at pagsulat nito nang wasto. Ang pakikinig ay sinasabing siyang tagapanguna ng gawaing pagsasalita. Ang kakayahan naman sa pagsasalita ay siyang nagiging kaugalian ng pagbasa at pagsulat.

Isinaalang-alang din ang layunin ng Ateneo de Davao Grade School sa pagtuturo sa kabataan ng mabuting pamumuhay at kalinisan ng hangarin sa buhay ng kabanalan at mabuting pag-uugali, ng kahalagahan ng tungkuling gagampanan ng isang mamamayan sa bansa at higit sa lahat ng pagiging tunay na Atenista para sa kapwa.

Pagkatapos ng Unang Baitang, inaasahang nakabibigkas at nakababasa ang mag-aaral ng mga alpabeto at mga simpleng salita nang may wastong - tunog; nakagagamit ng magagalang na pagbati sa pang-araw-araw na pag-uusap; naisusulat ang sariling pangalan at nakakasulat ng mga payak na pangungusap.

Pagkatapos ng Ikalawang Baitang, nakapagsasabi ang mag-aral ng pangunahing diwa ng napakinggan; nakapaglalarawan ng mga tao, bagay, pook, nakababasa nang may wastong paglilipon ng mga salita at nakasusulat ng kabit-kabit na mga titik na gumagamit ng wastong bantas.

Pagkatapos ng Ikatlong Baitang, nakapagsalaysay ang mag-aaral ng buod ng napakinggan/nabasa; naibibigay ang sariling palagay tungkol sa isyung pinag-uusapan; nakababasa at naipapaliwanag ang kahulugan ng mga salita; natutukoy ang pagkakaiba ng opinyon at katotohanan; nakababasa nang may pag-unawa at naisusulat ang mga idiniktang iba't ibang anyo ng teksto.

Pagkatapos ng Ikaapat na Baitang, nakapagpapahayag ang mag-aaral ng sariling ideya at kaisipan tungkol sa mga narinig; nakapagbibigay rin ng reaksiyon at nakalalahok sa iba't ibang talakayan; nakagagamit ng matatalinghagang salita at mga ekspresyong tuwiran at di-tuwiran; natutukoy ang mga pangyayaring nag-uugnay sa sanhi at bunga ng mga pangyayari at napagsusunud-sunod ang mga ideya at sitwasyon; nakikilala ang iba't ibang bahagi ng babasahin at nakikilala ang iba't ibang bahagi ng babasahin at nakasusulat na ng maikling komposisyon.

Pakatapos ng Ikalimang Baitang, nakapagbubuod ang mga mag-aaral ng nabasa at napakinggan; makabubuo ng iba't ibang pangungusap; nakagagamit ng iba't ibang sanggunian sa paghahanap ng impormasyon at nakasulat nang iba't ibang pahayag at sulating may 15 - 20 pangungusap.

Pagkatapos ng Ikaanim na Baitang, nakapag-aayos ang mag-aaral ng napakinggang teksto at naililipat ang impormasyon tungo sa iba pang anyo ng pagpapahayag; nagagamit ang iba't ibang pangungusap sa pagpapaliwanag, nakapagbibigay solusyon sa mga suliranin batay sa karanasan at mga natutuhang kaalaman sa anumang sitwasyon at nakasusulat na ng ilang salaysay o dayalogo sa tulong ng mga ideya/tala na binuo ng klase.

MGA ARALIN